هَتْفِك أسْرِي مـ الليالي ازاي يا فالِح!! أشعار هناء الوصيف

رمزي حلمي لوقا

اخر تحديث :

هَتْفِك أسْرِي مـ الليالي ازاي يا فالِح!!

فاتح على الأحلام هَوِيس!

قاطِف لِي مـ الشمس الشعاع، عِيلَه وبَصِيرَه!

فارِد بُساطك ع الفضا نُصرَه وخلَاص!

ده انت القريب نسَّاي لُقَا

نسَّاي خيالي الضِّل زارع ضِحكتُه على ضَفِّتَك شجرة نَبَق

نسَّاي حديتي الطبطبَات

صُبحي ومِسَايَا أغنيات، ملْح لـ حياه

صُوتي، هِتَافي الرَّجَّه في قلبك مِيدان

"لُقمَان" عيوني الناصحات ودليل شرُودك فى السفر

انت اللي دُنياك القفَص

ضَالَّه الحرَس ذِكر وصلاه والنفْس أمَّاره

انت اللي لابس وِحدتك سجن انفرادي

راضي بضيَاعك والشطط

كارِه براحات التجلِّي

جاهلَه المنابع يَمِّتَك عَطَشِي التَّملِّي للفيُوض

شُوقي المقَدَّر فَصّ تُوت...

لغْمَط شطُوط قلْب العيَال

خلِّتني اشقَّق مـ الجفاف

انشف فى جلدي

"القَزّ" من ريحة التخلِّي حزين مِطَاطِي

والطير على فَرعِي انفطر مأسوف صريع

ممصوص دِمَاه الزقزقه

مفدُوغ جناحُه الرفرفه من كهربة يأس احباطاتي

والشعر متلصَّم إزاز

بهتان بيوتُه ومنطفيه

من حشرجة لحْن احتشاد الصبر موَّالي بَيَات

ارمي اللي فات على طول إيديك الشايله عِندَك فى الكَفَن

على وَعدك المصلوب مآته

على جسر أنقاضي اليقين

لَملِم جدوري مـ الشتات

عَلَّق بواقي الذكريات براويز صور

امسح شخابيط القلق ورتوش منتْوَرها الغياب

هُسسسسس

احضنِّي صمْت

اِروِي بضمير

جايز نِطِير بالليل نجوم

جايز نِجِن...!

بشويش تحِنّ الوَحشه زادي ونتحِد.

...

أشعار

هناء الوصيف

تعليقات