.jpeg)
عروسة....المهد
...
أنا الحلوة اللى مالى زي.
أنا أشطر بنات الحي.
أنا اللى أبويا خلـٌفني قمر طالع،
فى عز الليل.
وخلف لي من خوفه علي بعد بعده،
أسُوود..واسباع.
أنا اللى عندى رجالتي،
عددهم كام وعشرين خيي.
أنا اللى أبويا عمره ماباع،
قمر ليله لأى غريب.
انا الأمجاد
أنا العِزة
ولو سألونى :إيش إسمك يازينة الناس؟
أقول: "غزة".
كرامتي فوق حدود الكل.
مانا أصلي مونسني.
وليا أخوات فى عين الشمس،
حل....وضل.
صقور ..ونسور..بتحرسني.
ومين يجرأ بطرف العين يبص علي؟!!!!
ومين يجرأ بكف يمينه يلمسني؟!!!
ولما" الأقصى" ناداني بدمع العين.
وقلب" خليلي" خباني شمال ويمين.
قالولى: ديب كسر بابك وحل" جنين."
و"عكا"...و"يافا" مكسورة،
وكنيسة المهد....
قولولي: مين من اخواتي اللى خان العهد؟؟؟؟
قولولي: مين من اخواتي اللى باع الود؟؟؟
قولولي: مين من اخواتي شاف الصهيوني آسرني ماقمشي يرُد؟؟؟
أبويا مات وفهمني إني مش وحدي.
معايا اخوات يشقّوا الخوف بخنجرهم،
وبين نيران أعاديهم،
أقل ما فيهم ايعدي.
ولو كان التمن موته،
عشان شرفي
عشان عاره،
تقيد ناره،
يعدى بحور من الاهوال،
فى غمضة عين يكون عندي.
أكيد فيه شي مش فهماه،
ايه اللى يخلى أخويا
يشوفني بتبهدل قصاد عينه،
ويبص وراه.؟
وفى القرآن وفى الانجيل،وفى التوراة،
أنا الغاليه.
أنا القبه،انا الصخرة،
أنا راية سما عاليه.
أنا الإسراء أنا المعراج،
انا فى العهد والمزامير،
بكاااام حجة وتقديسة.
تدوس ارضى عيال خنازير،قلوب مرضانه وخسيسة؟؟
ياخويا ياللى شايفني،
وانا فى الوحل بتمرغ،و
مغصوبة ..ومعصوبة.
وشايف أولادي ودماهم،
على الأسفلت.
وشايف كل حورية على أرضي،
ب ١٠٠ راجل.
سلاحها صاحي فى ايديها،
ونسيت إنها كات بنت.
أنا وأولادي هنحارب لأخر يوم.
لأن القدس عربية.
كيان واحد،مفيش القدس شرق وغرب.
لأن القدس عربية..
هقدم روحي واولادي كمان قربان.
وهستنى إنتصار الرب.
أنا فى وش الطوفان وحدي.
ولا عمره هيغلبني،
أنا بس اللى عايبني،
يقولوا القدس ملهاش حد!!!
يقولوا القدس ....
ماليهاش.....
حد.
...
أشعار
ايمان العطيفي
مصر